Eze 34 | ZomZIV | STEP | TOPA thu kei tungah hong tunga:

Ezekiel 34

Tuucingte le Tuute

1 TOPA thu kei tungah hong tunga: 2 “Mihing tapa aw, Israel tuucingte langkhatah thu genkhol in; thu genkhol inla amaute tungah: ‘Hih in Thupipen TOPA gen ahi hi: Amaute kia bek a kidon Israel tuucingte in gimna nak thuak na uncia! Tuucingte in tuuhonte a cin ding uh hi lo ahi hiam? 3 Note in nawithau na ne uh a, a mul puanin silhin, ganhing limcite na go uh hi, ahi hangin gan honte na kem kei uh hi. 4 A zawngkhalte na khoi kei uh a, a cinate kem loin a liamnate na bawlsak kei uh hi. Lamkhialte na khiang kei uh a, a mangte na zong kei uh hi. Amaute ngeh gawpgawpin khelbawlin na uk uh hi. 5 A cing om lo ahi manin kithehthang uh a, a kikhenthang uh ciangin gamsa gilo khempeuh an a suak uh hi. 6 Mual lian khempeuh tung le mual sang neu citeng tungah ka tuute vakzau uh hi. Amaute leitung bupah kithehthang uh a, kuamah in zongin a kan kei hi. ^a

7 “’Tua ahi ciangin no tuucingte aw, TOPA kammal za un: 8 Thupipen TOPA in, ka nuntakna ka lo hi, ka tuute in a cing nei loin hih bangin kikaimang a, ganhing gilote khempeuh an a suahna uh le ka tuucingte in ka tuuhonte zong loin tuuhonte a kep tangun amau le amau kikem uh hi. 9 Tua ahi ciangin tuucingte aw, TOPA kammal za un! 10 Hih in Thupipen TOPA gen ahi hi: Keimah tuucingte langah ka panga ka tuuhonte hangin ka thuaksak ding hi. Tuucingte amau le amau a kivak theih nawn loh nadingun ka tuute a omna panun ka hemkhia ding hi, amaute kamsung panin ka tuute ka hukhia dinga amaute an a suak nawn kei ding uh hi.

11 “’Ahang in, hih in Thupipen TOPA gen ahi hi: Keimahmah in ka tuute zongin ka kem ding hi. 12 Tuucingpa khat in a kithehthang ama tuute a cin bangin ka tuute ka cing ding hi. ‘Meiipi lak, khuamial lakah a kithehthang hun uh cingin amaute omna munmun ah ka hukhia ding hi. 13 Minamte panin ka samkhia dinga, gam tuamtuam pan kaikhawmin amaute neihsa gamah ka puak ding hi. Israel mualte tung le kuam sung, mite tenna khempeuh ah ka gamtasak ding hi. 14 Amaute lonona munah ka cing dinga Israel mualsangte a gamtatna mun uh hi ding hi. Gamtatna mun hoih ah lum ding uh a, Israel mualte tung lonona mun tua lai-ah ka kigamtasak ding hi. 15 Keimah in ka tuute ka cing dinga amaute ka lumsak ding hi. Thupipen TOPA in cikhia hi. 16 A mangte ka zong dinga lam khialte ka kaikhawm ding hi; a liamnate ka tunsak dinga a zawngkhalte ka khoi ding hi. Ahi hangin athau a hatte ka susia ding hi. Ka tuuhonte thutangin ka cing ding hi. ^b

17 “’Ka tuuhonte aw, hih in note adingin Thupipen TOPA gen ahi hi: Tuute khat le khat kikal le tuutalte le keeltalte kikal ah thu ka khen ding hi. 18 Lonona munah an hong kivak ciangin tua tawh lungkim zo nai lo na hi uh hiam? Na nek loh teng uh zong tuancil lai hi lo na hi uh hiam? Tui siangtho na dawn uh tawh lungkim zo nai lo na hi uh hiam? Na dawn loh teng uh na khe un tuanbuan hi lo na hi uh hiam? 19 Na tuatcilsate uh le na tuat buansate uh tawh keima tuuhonte kivak kul hi lo hiam? ^c

20 “’Tua ahi ciangin amaute tungah Thupipen TOPA in hih thu a gen hi: Keimah in ka tuu gawngte tung le ka tuu thaute tungah thu ka khen ding hi. 21 Bang hang hiam cih leh na pang uh le na liangdaak un tuu gina lote khempeuh phu in na hawlkhiat zawh matengun na ki uh tawh na pik uh hi. 22 Ka tuuhonte ka hon dinga amaute kikaikhiamang nawn lo ding hi. Ka tuute khat le khat kikal ah thu ka khen ding hi. 23 Amaute a uk ding tuucing khat ka nasempa David ka koih dinga amah in amaute a vak ding hi; amah in amaute vakin amaute a cingpa hi ding hi. 24 Keimah TOPA a Pasian uh ka hi dinga, amaute lakah ka nasempa David a ukpa uh hi ding hi. Keimah TOPA in ka gensa ahi hi. ^d

25 “Amaute gamsimtham ah tenga, lungmuangtakin tulakah a lup theih nadingun amaute tawh kilemna thukhun ka bawl ding hi. 26 Amaute le ka mual ^{▼▼34.26 Ahikeh Keimah in amaute ka bawl dinga ka mual kimkot a munte thupha ka pia ding hi.} kimkot munte thupha ka pia ding hi. A khuahun zui-in guah ka zusak dinga; thupha guah ka zusak ding hi. 27 Lo sunga singkungte gah ding uh a, leitang in an tampi piangsakin mite amau leitang ciatah nuamtakin a teng ding uh hi. A hakkol zawlte uh kuaihtansak a, sila a, khawite khut pan ka hutkhiat ciangin amaute in keimah TOPA ka hilam hong thei ding uh hi. 28 Minamte in amaute galmatin kai nawn lo ding uh a, gamsate an a suak nawn kei ding uh hi. Lungnuamtakin teng ding uh a, kuamah in a lausak kei ding hi. 29 Amaute an pianna a minthang gam khat ka pia dinga a gam-uah kialpi tung nawn lo dinga minamte in zong a simmawh nawn kei ding uh hi. 30 Tua ciangin keimah TOPA amaute Pasian amaute tawh a omkhawm ka hilam thei in amau Israel innkuante ka mite hi ding uh hi, Thupipen TOPA in cikhia hi. 31 No ka tuute, ka lonona-a gamta ka tuute, ka mite na hi uh a, keimah note Pasian ka hi hi,’ Thupipen TOPA in cikhia hi, ci in,” hong ci hi.